Il Partît Democratic in Regjon al sosten la famee e la formazion professionâl dal lavoradôr autonom cun contribûts a fonts pierdût

Cul centriçampe al Guvier, la Regjon e je dongje dai libars professioniscj

Dal 2008 il numar di partidis IVZ, professioniscj e consulents in Italie al è calât di 400.000 unitâts (ISTAT)*:

  • su 22,7 milions di lavoradôrs atîfs in Italie a son autonoms pôc plui di 5**
  • vuê il lavôr autonom al riclme l'85,7% dai zovins tra i 14 e i 24 agns **

La cariere di libar professionist e ufrìs la pussibilitât di cjatâ une ocupazion sodisfasinte in timps curts, ma lis tutelis sociâls plui bassis e lis inciertecis retributivis a esponin 1 lavoradôr autonom su 4 al pericul de puaretât (ricercje CGIA)***.

In graciis des politichis dal Grup consiliâr PD e de Zonte di centriçampe dal Friûl - Vignesie Julie, cui che al sielç il lavôr autonom al pues contâ su la poie publiche pe sô formazion professionâl e su misuris di benstâ sociâl puartadis indevant par se e pe sô famee.

Contribût a fonts pierdût al professionist pe nassite di un fi

La nassite di un fi al è un avigniment che al cambie la vite di cualsisei. Conciliâ lis gnovis esigjencis di gjenitôr cui impegns di lavôr al è simpri dificil, par un professionist ancjemò di plui che par un lavoradôr dipendent. Propit par chest, la Regjon Friûl - Vignesie Julie e jude cui che al è deventât gjenitôr e che al fâs la libare profession cuntun contribût a fonts pierdût par fâsi cuvierzi il puest o par fâsi judâ inte ativitât di un colaboradôr di fiducie. In graciis de poie publiche, lis gnovis mamis e i gnûfs papâs a puedin dedicâsi al frut savint di vê lassât il lôr lavôr in buinis mans.

Il contribût economic ai libars professioniscj al è concedût in câs di:

  • gravitât o complicazion de gravidance (dome pes maris)
  • nassite di un fi
  • adozion o afidament di un fi

Un aiût concret sul lavôr par 6 mês. Ve ca cemût che si pues fâsi sostignî te ativitât

Une persone di fiducie cun buine capacitât professionâl e je un supuart preziôs pal professionist che al è deventât gjenitôr. La Regjon Friûl - Vignesie Julie e à previodût doi gjenars di intervents par poiâ il lavoradôr autonom:

  • la sostituzion di vore
  • la colaborazion di vore

Cu la sostituzion il lavoradôr autonom al incjarie une persone abilitade ae sô stesse profession di fâ dutis lis sôs ativitâts. Par assegnâ la incarghe, il professionist al invie un rapuart di lavôr di nature autonome. La incarghe no pues jessi assegnade a:

  • socis
  • coniugâts
  • parincj o afins fin al secont grât

La durade dal rapuart e je di 6 mês. Chest periodi di timp al pues ancje jessi frazionât, in mût di sodisfâ lis esigjencis dal gnûf gjenitôr.

La colaborazion e previôt un rapuart di lavôr autonom o dipendent. Il titolâr al pues continuâ la sô ativitât judâtdi une persone abilitade ae profession. La durade massime dal rapuart di colaborazion e je di 6 mês. Ancje in chest câs il periodi al pues jessi frazionât intal timp.

L’articul al va in denânt chì sote. Tu podis lassà i tiei datos par vé lis gnovis sui servizis cà son par te:

Il 50% dal compens pal sostitût o pal colaboradôr al è a caric dal public

Il contribût regjonâl concedût ai professioniscj pe nassite di un fi al corispuint al 50% dal compens paiât al sostitût o al colaboradôr. La poie economiche e cjape dentri:

  • lis impuestis
  • lis cjamis previdenziâls e assistenziâls par un totâl massim di 1.000 euros al mês.

Pes fameis fragjilis il contribût al cuvierç il 60% dal compens

pal libar professionist che si cjate in cundizions familiârs plui complessis di frontâ, la Regjon e à cressût la percentuâl di cuviertidure publiche dal compens paiât al sostitût o al colaboradôr. I câs previodûts a rivuardin la nassite dal fi intune famee:

  • componude di un sôl gjenitôr
  • cun almancul 4 fîs minôrs convivents
  • cun fîs minôrs cun disabilitât grave

In chestis situazions, la poie economiche e cuvierç il 60% dal compens e e rive a un massim di 1.300 euros cun impuestis, cjamis previdenziâls e assistenziâls.

Plui cuviertidure economiche in câs di nassite di un fi cun disabilitât grave

Disasi, pôre e sens di inadeguatece a son lis reazions plui normâls di un gjenitôr se i nas un fi cun disabilitât. I paris e lis mamis si sintin responsabii de malatie dal frut e a metin la disabilitât tal mieç dal lôr vivi di ogni dì. In câs di disabilitât grave, il frut al à bisugn di assistence permanente, continuative e in dutis lis robis. Al gjenitôr i coventin timp e poie par deventâ cussient de gnove cundizion e par organizâ la sô vite in funzion des esigjencis familiârs, che cumò a son diferentis di prime. Il Grup consiliâr PD e la Zonte regjonâl alore a àn promovût politichis di benstâ sociâl che a dan al libar professionist un aiût economic che al cuvierç il 60% dal compens dal sostitût o dal colaboradôr. La poie e cjape dentri lis impuestis, lis cjamis previdenziâls e assistenziâls, e no pues passâ il limit massim di 1.000 euros al mês.

La percentuâl de misure e va al 70% dal compens cuant che la nassite di un fi cun disabilitât grave e sucêt intune famee:

  • componude di un sôl gjenitôr
  • là che a convivin almancul 4 fîs
  • là che a son za minôrs cun disabilitât grave

La poie economiche no pues passâ il limit massim di 1.300 euros al mês e e cjape dentri lis impuestis, lis cjamis previdenziâls e assistenziâls.

Cui che al pues domandâ il contribût

In Italie al è cressût il numar dai lavoradôrs autonoms che a fasin ativitâts no previodudis di ordins o coleçs (CNA)****.

La Regjon Friûl - Vignesie Julie e tutele ancje lis gnovis professions (art. 4 Leç Regjonâl 13/2004) concedint la poie:

  • a cui che al è iscrit regolarmentri a ordins o coleçs
  • a cui che al è iscrit a associazions ricognossudis de Regjon Friûl - Vignesie Julie
  • a cui che al esercite une profession iscrite inte liste dal Ministeri pal Disvilup Economic

Al pues vê il contribût cui che:

  • al è resident in Friûl - Vignesie Julie
  • al à studi o sede operative in regjon
  • al à fin a 45 agns (al moment de domande)
  • al à un ISEE familiâr dentri dai 35.000 euros

A puedin vê cheste poie i professioniscj che a fasin ativitât di vore in forme:

  • individuâl
  • associade
  • societarie

La domande di contribût e va presentade prime di scomençâ la sostituzion o la colaborazion.

Cui che nol pues domandâ il contribût

No son ametûts ae poie economiche pe nassite di un fi:

  • i dipendents lavoradôrs
  • i colaboradôrs di imprese familiâr
  • i artesans
  • i comerciants
  • i coltivadôrs direts
  • i titulârs di imprese
  • i aministradôrs di societâts di personis no professionâls
  • i aministradôrs di societâts di capitâi

Garanziis di vore ancje pal colaboradôr e pal sostitût

La Regjon e tutele ancje i libars professioniscj che a stan par cjapâ il puest o o par zontâsi dongje dal lavoradôr autonom inte sô ativitât. Par inviâ il rapuart di lavôr e covente une intese consensuâl tra:

  • il professionist che al propon la sostituzion o la colaborazion
  • il professionist incjariât dal lavôr
  • l'organisim competent dal ordin, dal coleç o de associazion professionâl di apartignince

La intese consensuâl tra lis parts e covente par garantî al sostitût e al colaboradôr un rapuart di lavôr trasparent e evitâ abûs. La procedure e individue:

  • lis modalitâts e i criteris di sielte dal sostitût o dal colaboradôr
  • i parametris cjapâts par determinâ il compens
  • il cost e la durade de incarghe

Contribût regjonâl a fonts pierdût pe formazion professionâl

Ai 14 di Jugn dal 2017 al è jentrât in vore in Italie il Jobs Act dal lavôr autonom che al da la pussibilitât di deduzion des spesis di formazion pai libars professioniscj. Cui che al à scomençât di pôc une ativitât autonome al sa che inzornâ lis sôs competencis al jude a jessi competitîfs intal marcjât dal lavôr ma al à un cost. Par sostignî a nivel economic i professioniscj plui zovins, il Guvier di centriçampe de Regjon Friûl - Vignesie Julie al à previodût un contribût a fonts pierdût pes spesis di formazion dai lavoradôrs autonoms in ativitât di mancul di 3 agns. La misure e vûl finanziâ i percors formatîfs inviâts cun:

  • organisims increditâts
  • ents o struturis publichis e privadis
  • ordins professionâi
  • academiis, scuelis e universitâts

Un aiût economic che al cuvierç fin al 90% des spesis di formazion

Il contribût al è un aiût consistent par cui che al à a pene inviât une ativitât o pal zovin professionist cuntun zîr di afârs ancjemò piçul. La poie economiche e je in relazion cul faturât e e cuvierç lis spesis ricognossudis al:

  • 90%, cuant che no je stade presentade ancjemò une declarazion sul faturât
  • 70%, cuant che il volum di afârs al è plui bas di 20.000 euros
  • 50%, cuant che il faturât al è jenfri 20.000 e 40.000 euros
  • 30%, cuant che il faturât al è parsore di 40.000,00 euros

Il totâl dal volum di afârs al è fissât su la fonde de ultime declarazion IVZ o dal ultin model Unic pes personis fisichis presentât. Il contribût public nol pues passâ i 10.000 euros e nol pues jessi cumulât cun altris misuris di poie economiche previodudis pe formazion professionâl. La detrazion fiscâl pes spesis di istruzion e determine il sbassament dal impuart di iscrizion amissibile a contribût.

Ve cui che al pues vê la poie economiche pe formazion

Destinataris dal contribût a son i residents in Friûl - Vignesie Julie che a fasin ativitâts professionâls individuâls, associadis e societariis cun sede operative in regjon. A puedin domandâ il finaziament i professioniscj:

  • iscrits in ordins o coleçs
  • iscrits tes associazions ricognossudis de Regjon
  • iscrits tes associazions de liste dal Ministeri pal Disvilup Economic

Il percors formatîf al scuen:

  • scomençâ dentri dai 3 agns de date di inviament de profession
  • sierâsi dentri dai 12 mês dopo de scjadince dai 3 agns cu la consegne di un titul

No son cuviertis lis spesis dai percors di formazion a distance.

Lis spesis ametudis al contribût regjonâl

La Regjon e vûl rinfuarçâ i nivei di competence e lis abilitâts individuâls. Il contribût al è previodût pes spesis di formazion conetudis cu la ativitât esercitade dal professionist. A jentrin inte misure lis spesis ancjemò di sostignî e chês sostignudis intai 12 mês prime de presentazion de domande.

Il contribût al cuvierç:

  • lis spesis di iscrizion e pe frecuence dal percors formatîf
  • l'acuist dai tescj che a coventin
  • il premi e lis spesis di istrutorie des garanziis fideiussoriis bancjariis o assicurativis a pro dal professionist

I lavoradôrs autonoms che a àn di movisi di almancul 100 km de lôr residence par lâ ai cors di formazion a puedin otignî il contribût ancje par:

  • lis spesis di viaç;
  • lis spesis di permanence (calcoladis a forfait)

Par informazions:

Servizi inovazion e professions tel. 040 377509/7/8

RIFERIMENTS

*(ISTAT/Sole 24 Ore)
**(ISTAT)
***(CGIA)
****(CNA)

Podaressin ancje interessàti chiscjui servizis: