Cul Partît Democratic in Regjon curis dentistichis a gratis e protesi a presit sbassât pai anzians cuntun redit bas

La prime Regjon in Italie a ufrî un program di odontoiatrie sociâl

La crisi che e à colpît la Italie intai ultins 10 agns e à fat che al sedi dificil frontâ lis spesis pe cure dai dincj:

  • 5 milions di talians a àn rinunziât a curâ i dincj*
  • dome che il 35,7% dai anzians talians al è lât dal dentist intal ultin an**

I obietîfs dal program regjonâl a son:

  • curis dentistichis a gratis pai anzians in dificoltât economiche
  • curis e protesi a presit calamirât pai anzians cence dincj cuntun redit bas
  • acès favorîts pai anzians cun patologjiis sistemichis o vulnerabilis
  • tratament a gratis des urgjencis

Curis a gratis pai anzians cuntun redit bas

Ducj i anzians residents in Friûl - Vignesie Julie a àn dirit di cê a gratis lis curis dentistichis cuant che a àn un redit fin a 15.000 euros. Ve ca i risultâts otignûts fin cumò dal program di odontoiatrie sociâl:

2016 Personis viodudis Prestazions furnidis
Anzians cun plui di 65 agns 26.438 34.620
2017 (zenâr-lui) Personis viodudis Prestazions furnidis
Anzians cun plui di 65 agns 16.596 20.915

Poie, assistence, curis ai anzians e a cui che nol à dincj

In Italie:

il 41,6% dai anzians cuntun bas titul di studi nol à nancje che un dint naturâl in bocje, intant che la percentuâl e va jù al 17,9% tra chei che a àn un titul di studi superiôr*

Stant che nissun nol à di restâ cence il just aiût, il Grup consiliâr PD e la Zonte regjonâl di centriçampe dal Friûl - Vignesie Julie a àn metût in vore misuris par judâ lis personis cun plui di 65 agns che a àn almancul une arcade cence dincj.
I intervents pe inserzion di protesis di podê gjavâ a previodin trataments sanitaris a gratis pai anzians cun ISEE fin a 15.000 Euros.

Il cost di ribasadure de arcade cence dincj e chel di realizazion de protesi a puedin jessi a caric dal pazient, ma su la base des fassis di redit:

FASSIS Trataments Ribasadure Protesi
ISEE fin a 6.000 Euros Gratis Gratis Gratis
ISEE fin a 10.000 Euros Gratis 60 Euros 250 Euros
ISEE fin a 15.000 Euros Gratis 120 Euros 500 Euros

Par vê il servizi i pazients a àn di presentâsi al sportel CUP de Aziende Sanitarie Regjonâl plui dongje cu la atestazion ISEE e la prescrizion dal miedi di medisine gjenerâl che e certifiche il stât di mancjance complete di dincj, almancul intune arcade.

L’articul al va in denânt chì sote. Tu podis lassà i tiei datos par vé lis gnovis sui servizis cà son par te:

Intervents par personis cun patologjiis sistemichis o vulnerabilis

Lis politichis de Regjon Friûl - Vignesie Julie a son atentis aes esigjencis dai pazients anzians che za a àn altris malatiis che a invalidin, di nature:

  • cardiovascolâr
  • metaboliche
  • neoplastiche
  • degjenerative

Dutis lis personis che a àn patologjiis sistemichis a àn canâi di favôr par vê i servizis, che a son dâts cun modalitât che a van incuintri aes lôr esigjencis personâls.

Par vê il servizi al baste esibî la prescrizion dal miedi di medisine gjenerâl cun codiç di prioritât D.

Si da atenzion a dutis lis personis che si cjatin in cundizions precariis di salût, par vie di curis o trataments par altris patologjiis. Lis prestazions odontostomatologjichis a son garantidis par chei che si cjatin in cundizions di:

  • spiete di traplant o posttraplant
  • imunodeficience grave
  • cardiopatie congjenite cianogjene
  • radioterapie fate o programade dal cjâf
  • patologjiis oncologjichis in tratament
  • pericul di osteonecrosi par vie di farmacs
  • emofilie grave e altris patologjiis gravis de coagulazion
  • tratament anticoagulant
  • disabilitâts neuropsichiatrichis gravis
  • malatiis raris cun coinvolziment dal distret orâl
  • tossicodipendence su rimant dal SERT
  • tratament inviâts dal servizi pes dipendencis
  • postums di traumis grâfs o intervents distrutîfs par patologjiis oncologjichis
  • malatie mentâl su rimant dal DSM
  • patologjiis metabolichis no compensadis
  • malatiis cardiovascolârs o cerebrovascolari grâfs
  • patologjiis inflamatoriis cronichis
  • gravidance
  • dialisi

I citadins no esentâts a paiaran dome il ticket par vê lis prestazions odontostomatologjichis.

A son ben 5 gnûfs Pront Socors odontoiatrics

In graciis des politichis dal Grup consiliâr PD e de Zonte regjonâl, ducj i citadins residents in Friûl - Vignesie Julie a àn a disposizion cinc gnovis struturis odontoiatrichis di urgjence.

Il Pront Socors pe diagnosi e pe cure des malatiis de bocje a son stâts ativâts in 5 sedis regjonâls:

  • Triest - Cliniche Odontoiatriche e Stomatologjiche dal Ospedâl Maiôr
  • Gurize - Servizi di Odontostomatologjie, Presidi Ospedalîr
  • Pordenon - Chirurgjie Maxilofaciâl e odontostomatologjie, Ospedâl S. Marie dai Agnui
  • Udin - Chirurgjie Maxilofaciâl Ospedâl S. Marie de Misericordie
  • Glemone - Ambulatori odontoiatric Presidi Ospedalîr de salût

Intai prins sîs mês di ativitât a son stâts regjistrâts za 4.500 acès intes struturis sanitariis pe cure dai dincj.

I Pronts Socors odontoiatrics a son centris specializâts intes:

  • Curis urgjentis
  • Visitis odontostomatologjichis
  • Diagnosi e tratament des lesions orâls precancerosis o neoplastichis

Ducj i Pronts Socors odontoiatrics a àn inviât percors par controi smirâts ae prevenzion e al tratament precoç dal carcinome orâl e si è daûr a vierzi un secont ambulatori a Udin.

Un sôl numar par acedi a ducj i servizis

Dutis lis prestazions a puedin jessi prenotadis:

  • intes farmaciis de regjon abilitadis
  • tai uficis CUP des Aziendis dal Servizi Sanitari Regjonâl
  • clamant il numar unic pe salût e pal sociâl: +39 0434 223522

Il servizi di prenotazion telefoniche al è in vore (ancje dome par informazions) di linie fisse e celulâr, dal lunis al vinars des 07.00 aes 19.00, e la sabide des 08.00 aes 14.00.

Il cost de clamade al dipent dal plan tarifari dal propri operadôr telefonic.

RIFERIMENTS

*Istituto Nazionale di Statistica
**(Condizione di salute anziani/ISTAT)

Podaressin ancje interessàti chiscjui servizis: